Om Swastyastu, punapi gatra semeton? Semeton sami, sekadi toya sane milir, nenten karasa galah gelis mamargi, warsa anyar 2022 pacang kakawitin. Dumogi Ida Dane stata ngamolihang karahayuan ring dija ja magenah. Kirang langkung sampun kalih warsa panglahlah gering agung Covid-19 nibenin jagate. Minab makeh pisan pikobet sane kepanggih ri sajeroning wewidangan ring kauripan. Nenten surud-surud utsaha sane kamargiang mangda prasida nepasin lara. Sakewanten Ri kala gering agung ngawinang kapetengan, sastra sane nyunarin galang, basa sane dados minyak, membah milir sekadi toya sane stata ngicen guna widya majeng sapa sira sane muatang.

Lestariang basa, sastra, miwah aksara druene.

Bulan Bahasa Bali warsa 2022 puniki mamurda Danu Kerthi : Gitaning Toya Ening - Toya Pinaka Wit Guna Widya. Teges ipun, Bulan Bahasa Bali nyihnayang indik pamargin guna widya sane membah nenten surud-surud nyihnayang kadharman, kerta raharja, miwah kautaman jagat. Parikrama puniki pacang kemargiang nganutin protokol kesehatan.  Parikrama ipun sekadi Mesatua Bali, Nulis Aksara Bali miwah Ngwacen Aksara Bali. 

Ngiring sayagayang tur sanggra parikrama Bulan Bahasa Bali 2022 puniki. Info sejangkepnyane pacang kasobiahang ring media sosial Desa Sumerta Kaja.